Композитор Сәяр Хәбибуллинны иртәгә җирлиләр
22 мартта танылган татар композиторы, Татарстан Республикасының атказанган сәнгать эшлеклесе Сәйяр Хәбибуллин 96 яшендә вафат булды.
Мәрхүмне соңгы юлга озату мәрасиме 25 мартта 10.30 сәгатьтә Мәскәү Җәмигъ мәчетендә була. Аны Данилов мөселман зиратында җирлиләр. Бу турыда Татарстанның Мәскәүдәге Тулы вәкаләтле вәкиллеге сәхифәсендә хәбәр итәләр.
Сәйяр Хәбибуллин Илһам Шакиров, Әлфия Авзалова, Рафаэль Ильясов кебек легендар артистлар башкарган татар җырларына җитмештән артык лирик көй язган. Бүгенге көндә бу әсәрләрне Идрис Газиев, Роза Хәбибуллина, Илһам Вәлиев, Алинә Шәрипҗанова, Раяз Фасыйхов, Лилия Муллагалиева һәм башкалар башкара.
2026 елның гыйнварында композитор Татарстанның Россия Федерациясендәге Тулы вәкаләтле вәкиллегендә Татарстан Республикасы вице-премьеры – Татарстан Республикасының Россия Федерациясендәге Тулы вәкаләтле вәкиле Равил Әхмәтшин чакыруы буенча 95 яшьлек юбилеен билгеләп үтте.
«95 яшькә кадәр яшәрмен дип беркайчан да уйламаган идем! Әмма минем иҗатым яңа җырлар һәм көйләр белән тулылануын дәвам итә. Минем бөтен тормышым – музыкада», - дип нәтиҗә ясаган иде ул шул вакытта.