Фәнис Җиһанша: «Концерт алып барганда гөрселдәп егылдык. Сузылып яттык...»

Камал театры артисты, алып баручы Фәнис Җиһанша сәхнәдә булган кызыклы, урыны белән кызганыч хәлләрне туплаган. Бу хакта ул үзенең социаль челтәрдәге сәхифәсендә яза.

Концерт алып барганда гөрселдәп егылдык. Тамашачылар алдында сузылып яттык... Партнерым белән. Шуннан соң башка минем белән сәхнәгә чыкмады бугай ул. Ул Гөлназ Сәфәрова иде.

Чиләбедә үземнең иҗади кичәм вакытында, шигырь укыганда, хисләнеп, кулларымны селтәп җибәргән идем, сценарий планшетымнан чыгып очты. Ап-ак кар бөртекләре ничек җиргә төшеп ята, нәкъ шулай – яртысы залга, ә калган яртысы сәхнәгә коелды... Мин шпаргалкасыз калдым!

Әтнә якларында үз чыгышымны башлаганда, арттагы 3 рәт кеше дәррәү торып чыгып китте.

Мондый очраклар гел булып тора. Мин бераз драматизм белән сугарылганнарын искә алдым, ә комедиясе – муеннан. Шул вакытта бары бер сорау тора башта: нишләргә? Тамашачы уйлый, нишләр икән, ди. Мин исә әлеге ситуацияләрдән чыгу юлларын беләм һәм сезгә дә ярдәм итәргә булдым. Языгыз әле, сезнең белән нинди кызык хәлләр булганы бар. Урыс әйтмешли «разберем», – дигән актер.